ვახტანგ ყოლბაია ჟენევაში იმყოფება

zheneva

ჟენევაში საერთაშორისო მოლაპარაკებების 41-ე რაუნდი მიმდინარეობს. აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია საქართველოს დელეგაციათან ერთად ჟენევაში იმყოფება. დელეგაციას საქართველოს საგარეო საქმეთა მინისტრის მოადგილე დავით დონდუა ხელმძღვანელობს.

საერთაშორისო მოლაპარაკებების 41-ე რაუნდზე მხარეები განიხილავენ აფხაზეთსა და ცხინვალში გახშირებული სამხედრო წვრთნების, მავთულხლართების, საზღვრის უკანონოდ გადმოწევის საკითხებს.

მხარეები იმსჯელებენ, ასევე, გალის რაიონში მცხოვრები ქართველების მძიმე სოციალურ და ჰუმანიტარულ მდგომარეობაზე, ადამიანის ფუნდამენტური უფლებების დარღვევებზე, როცა გალის ადგილობრივ ქართველ მოსახლეობას აიძულებენ უცხოელებად დარეგისტრირებას, უზღუდავენ საკუთრების, თავისუფლად გადაადგილების, მშობლიურ ენაზე განათლების მიღების უფლებებს.

ჟენევის საერთაშორისო მოლაპარაკებების 41-ე  რაუნდი 10-11 ოქტომბერს გაიმართება.